Það er dásamlegt að lesa á sumrin, hvort sem það er úti í sólinni eða inni í tjaldi í rigningu!  

Þess vegna ætlum við að bjóða upp á sumarlestur fyrir fullorðna í sumar. Einfalt mál, þú skráir þig hér á síðunni og ert þá með á sumarlestrarpóstlista. Þá verður Instagram-síða Bókasafns Kópavogs undirlögð af Leslyndi í sumar svo fylgist vel með til að fá góðar hugmyndir að næstu bók! 

Umsagnir verða nýttar til að koma góðum bókum á framfæri við aðra lesendur. 

Þrjár leiðir til að taka þátt í leslynda sumrinu: 

1. Keppandinn 
Til að taka virkan þátt í sumar og eiga möguleika á vinningi í hverri viku skráir þú þig fyrst í Leslyndið og sendir svo inn umsögn um hverja bók sem þú lest í sumar. Umsögn má vera stutt, miðlungs eða löng – alveg eins og þú vilt. 

2. Klappliðið 
Þátttakendur sem vilja skrá sig og vera með en ætla aðallega að sjá hvað annað fólk les í sumar og vilja eiga séns á vinningi ef góð bók dettur í fangið á þeim, sendið bara inn umsögn ef það gerist. 

3. Áhorfandinn 
Fyrir þau sem vilja ekki skrá sig en taka þátt úr öruggri fjarlægð gera það með því að fylgjast með á Instagram-síðu Bókasafns Kópavogs. 

Drögum út vinningshafa vikulega!