Rafbókasafnið leiðbeiningar

Rafbókasafnið byggir á OverDrive rafbókaveitunni.

Þú þarft gilt lánþegaskírteini og PIN-númer hjá Bókasafni Kópavogs.

Þú skráir þig inn á Rafbókasafnið með strikamerkisnúmerinu á lánþegaskírteininu þínu og PIN-númeri. Ath: ekki er hægt að nota kennitölu við innskráningu, heldur er nauðsynlegt að nota strikamerkisnúmer á lánþegaskírteini.

Þú getur einnig skráð þig inn með Facebook eða sérstökum OverDrive-aðgangi en til þess að fá lánað þarftu að gefa upp númerið á lánþegaskírteini og PIN-númer í fyrsta skipti sem það er gert.

Þú getur valið hvort þú færð bók að láni í 7, 14 eða 21 dag.

Þú getur haft 5 bækur að láni í einu og sett inn 7 frátektir.

Bók sem hefur verið tekin að láni skilast sjálfkrafa að lánstíma liðnum og því er engin hætta á dagsektum. Auðvitað er líka hægt að skila fyrr.

Hægt er að lesa rafbækur eða hlusta á hljóðbækur frá Rafbókasafninu í vafra í tölvum, spjaldtölvum og snjallsímum og því er ekki nauðsynlegt að hlaða niður neinum forritum til þess.

Viljir þú lesa eða hlusta án þess að vera nettengd(ur) þarftu að ná þér í OverDrive appið eða Adobe Digital Editions forritið og hlaða bókinni niður.

Overdrive appið

OverDrive appið er fáanlegt fyrir iPhone®, iPad®, Android, Chromebook, Windows Phone, Windows 8 & 10, Kindle Fire HD og má nálgast t.d. í veiðeigandi veitum svo sem Play Store og App Store. Lesa má nánar um appið og sækja það hér.

Lesbretti

Hægt er að lesa bækur Rafbókasafnsins á þeim lesbrettum sem notast við ePub formið. Þetta eru flestar gerðir lesbretta aðrar en Kindle. Ekki er hægt að lesa bækur Rafbókasafnsins í Kindle lesbrettum að Kindle Fire undanskildu.

Ef ætlunin er að lesa rafbók á lesbretti þarf að stofna Adobe ID-aðgang og hlaða niður Adobe Digital Editions forritinu á tölvu.

Bókinni er svo hlaðið niður í Adobe Digital Editions og færð þaðan yfir á lesbrettið.

Nánari upplýsingar

Allar nánari upplýsingar um Rafbókasafnið má fá á bókasafninu í síma 441-6800 eða í tölvupósti bokasafn@kopavogur.is. Ábendingar eru einnig vel þegnar.