Sigurjón Birgir Sigurðsson, einnig þekktur undir listamannsnafninu Sjón, verður gestur okkar í Leslyndi miðvikudaginn 3. desember.
Sjón fæddist 27. ágúst 1962 í Reykjavík og var einungis 16 ára þegar hann gaf út sína fyrstu ljóðabók, Sýnir (1978). Hann hefur síðan þá skrifað fjölda ljóðabóka og skáldsagna, skrifað leikrit, samið texta við lög og gefið út efni fyrir börn, auk þess að vera einn af stofnendum súrrealistahópsins Medúsu og útgáfufélagsins Smekkleysu.
Sjón hefur hlotið ýmsar viðurkenningar fyrir störf sín og verk, en sem dæmi má nefna Bókmenntaverðlaun Norðurlandaráðs 2005 fyrir skáldsöguna Skugga-Baldur, Íslensku bókmenntaverðlaunin árið 2013 fyrir skáldsöguna Mánastein og hlotið ásamt Björk tilnefningu til Óskarðsverðlaunanna og Golden Globe-verðlaunanna árið 2001 fyrir besta frumsamda lag.
Leslyndi hverfist um yndislestur og uppáhaldsbækur. Þjóðþekktir bókaunnendur stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk, orðið er frjálst. Viðburðaröðin hefur notið mikilla vinsælda og skapað sér fastan sess undanfarin misseri, þegar fólk flykkist að til að sjá hina ýmsu rithöfunda deila með okkur sínum uppáhaldsbókum.
Aðgangur er ókeypis og öll hjartanlega velkomin á meðan húsrúm leyfir.
Viðburðurinn er styrktur af menningar- og mannlífsnefnd Kópavogsbæjar.
