Kammerhópurinn Stundarómur er hópur ungs tónlistafólks. Hópurinn samanstendur af Ólínu Ákadóttur (píanó), Hafrúnu Birnu Björnsdóttur (víóla), Steinunni Maríu Þormar (selló og söngur), Daniel Haugen (euphonium og tónskáld) og Ester Aasland (klarinett og tónskáld).
Tónleikarnir eru hluti af tónleikaröð Stundaróms sem fer fram á höfuðborgarsvæðinu og tveimur bæjum í Noregi. Tilgangurinn er að tryggja jafnan aðgang barna að vönduðum tónlistarviðburðum óháð fjárhagslegri stöðu foreldra og forráðamanna og verða því tónleikarnir að kostnaðarlausu.
Tónleikarnir byggja á frumsamdri sögu sem ber nafnið Tröllkonan og töfraeyjan. Sagan er innblásin af norsku þjóðsögunni Soria Moria slott og íslensku þjóðsögunni Álarnir eru djúpir milli Íslands og Noregs og leggur áherslu á samvinnu og náttúruvernd.
Frumsamin tónlist og útsetningar munu hljóma með þjóðlagaívafi frá báðum löndum ásamt sígildum verkum eftir önnur norræn tónskáld.
Tónleikarnir eru tónleikasaga þar sem börnin fá að syngja með, hreyfa sig, svara spurningum og vera virkir þátttakendur. Með samskiptum á milli áhorfanda og flytjenda fá börnin að hafa áhrif á upplifunina, læra um tónlist á skapandi hátt og finna að þeirra þátttaka skiptir máli.
Tónleikarnir henta börnum á aldrinum 3-6 ára.
