Mezzósópransöngkonan Hildigunnur Einarsdóttir er gestur Magnúsar Lyngdal í Einfaldlega klassík að þessu sinni. Hildigunnur hefur um árabil verið í fremstu röð íslenskra söngvara á sviði sígildrar tónlistar og var á þessu ári ráðin ein af fyrstu sex fastráðnu söngvurunum við hina nýstofnuðu óperu.
Hildigunnur lauk söngnámi frá Söngskólanum í Reykjavík og stundaði framhaldsnám í Þýskalandi og Hollandi. Hún hefur einnig lokið B.A.-prófi í skapandi tónlistarmiðlun frá Listaháskóla Íslands. Samhliða fjölbreyttum söngferli stjórnar hún Árkórnum í Reykjavík og Kvennakórnum Kötlu, kennir söng og hefur haldið námskeið í söng og skapandi tónlistarmiðlun.
Á undanförnum árum hefur Hildigunnur skipað sér í fremstu röð íslenskra söngvara í kirkju- og tónleikahaldi. Hún hefur flutt stór einsöngshlutverk í verkum Händels og Bachs, komið fram með helstu tónlistarhópum landsins, frumflutt fjölmörg íslensk tónverk og sungið með listafólki á borð við Barböru Hannigan og Yo-Yo Ma.
Árið 2023 hlaut Hildigunnur Íslensku tónlistarverðlaunin fyrir söng ársins í flokki sígildrar tónlistar og samtímatónlistar.
Í Einfaldlega klassík ræðir Magnús Lyngdal við Hildigunni um tónlistarferilinn, lífið á sviðinu og ástríðuna fyrir söngnum. Samtalið er kryddað með lifandi tónlistarflutningi sem gefur áheyrendum einstakt tækifæri til að kynnast listakonunni og list hennar.
Aðgangur á viðburðinn er ókeypis og öll eru velkomin.
Einfaldlega Klassík er hluti af viðburðaröðinni Menning á miðvikudögum sem fer fram á miðvikudögum í menningarhúsum Kópavogs og er styrkt af menningar- og mannlífsnefnd Kópavogsbæjar.
