Í hádeginu þann 24. september munu söngnemendur úr Tónlistarskóla FÍH, þær Agnes Sólmundsdóttir og Steinunn Jónsdóttir, flytja lög af plötu Erlu Þorsteinsdóttur – Stúlkan með lævirkjaröddina á Bókasafni Kópavogs. Komið og eigið notalega stund í haust hlýjunni.
Erla Þorsteins var ein ástsælasta söngkona 20. aldarinnar. Ferill hennar spannaði þó aðeins fimm ár, en hún hætti að syngja 26 ára gömul til að sinna eiginmanni og fjölskyldu. Þrátt fyrir það náði hún að gefa út bæði plötur og smáskífur og á þeim er að finna fjöldann allan af lögum sem hún gerði ódauðleg.
Meðal laga sem Erla söng eru Þrek og tár, Litli tónlistarmaðurinn, Kata rokkar, og Vagg og velta – sem var svo frægt að verða bannað í ríkisútvarpinu. Víst er að síðari tíma kynslóðir þekkja tónlist hennar enn í dag og hafa margir tekið lög hennar til endurvinnslu, má þar nefna Björk og Tríó Guðmundar Ingólfssonar á plötunni Gling gló.
Um flytjendur:
Agnes Sólmundsdóttir er vestfirsk söngkona frá Þingeyri í Dýrafirði. Þar hóf hún snemma tónlistarnám á fiðlu og píanó og þá var ekki aftur snúið. Hún hefur tekið þátt í ýmsum tónlistarverkefnum í gegnum tíðina, verið í hljómsveitum, var lengi meðlimur Gospelkórs Jóns Vídalíns og hefur starfað sem bakraddasöngkona í hinum ýmsu verkefnum, t.a.m í sjónvarpsseríunni Kvöldstund með Eyþóri Inga sem sýnd var á Stöð 2, tribute tónleikum RIGG viðburða; „George Michael Sextugur“ og Stórafmælistónleikum Herberts Guðmundssonar. Síðustu ár hefur hún fært sig meira yfir í jazzinn og verið að vinna í og flytja eigið efni.
Samhliða tónlistinni kennir Agnes söng við Söngskóla Maríu Bjarkar og starfar sem blaðamaður hjá Birtíngi. Agnes hóf nám í rytmískum söng við Tónlistarskóla FÍH árið 2022. Hún lauk miðprófi haustið 2024 og stefnir á framhaldspróf í ár.
Steinunn Jónsdóttir er uppalin í suðurhlíðum Kópavogs og sleit því barnsskónum í nágrenni bókasafnsins. Hún er einn af forsprökkum hljómsveitanna Amabadama og Reykjavíkurdætur og hefur starfað við tónlist síðan 2011, bæði sem flytjandi og höfundur. Á sínum yngri árum lærðu hún á víólu í Tónlistarskóla Kópavogs og söng í kór hjá Margréti Pálmadóttur. Hún hefur komið fram víða um land sem og erlendis, og tónlist hennar hefur notið mikilla vinsælda á íslenskum útvarpsstöðum. Í dag vinnur hún að sinni fyrstu sóló plötu.
Samhliða tónlistarferlinum hefur Steinunn kennt börnum bæði dans, texta- og lagasmíðar. Í dag starfar hún við tónlistardeild Fellaskóla auk þess sem hún er blaðamaður hjá Birtingi. Steinunn hefur verið nemandi í FÍH síðan 2023, lauk miðprófi nú í vor og stefnir á framhaldspróf á næsta ári.
Fjórða árið í röð bjóða framhaldsnemendur af söngdeild Tónlistarskóla FÍH til ljúfra hádegistónleika á Bókasafni Kópavogs.
Tónleikarnir fara fram síðasta fimmtudag hvers mánaðar en þar stíga tónlistarstjörnur framtíðarinnar á stokk með spennandi blöndu af gömlu og nýju, lög sem öll þekkja í bland við sjaldheyrðari smelli.
Tónleikarnir standa yfir í um hálfa klukkustund og eru öllum opnir á meðan húsrúm leyfir. Aðgangur ókeypis.
