Ævar Þór Benediktsson, einnig þekktur sem Ævar vísindamaður, verður gestur okkar í Leslyndi miðvikudaginn 4. mars kl. 12:15.
Ævar er fæddur 9. desember 1984. Hann útskrifaðist frá Menntaskólanum á Akureyri árið 2004 og úr leiklistardeild Listaháskóla Íslands árið 2010. Hann hefur leikið á sviði og í sjónvarpi og framleitt eigið efni fyrir útvarp og sjónvarp.
Fyrsta bók hans kom út árið 2010 og hefur Ævar síðan 2011 skrifað mikinn fjölda barna- og unglingabóka og staðið fyrir vinsælu lestrarátaki, en fyrir það var hann tilnefndur til alþjóðlegu ALMA-verðlaunanna, minningaverðlauna um Astrid Lindgren.
Ævar hefur fengið fjölda annarra verðlauna og tilnefninga fyrir skrif sín, en fyrsta bókin í Þín eigin-bókaflokknum, Þín eigin þjóðsaga, hlaut Bókaverðlaun barnanna og Bókmenntaverðlaun starfsfólks bókaverslana.
Þá voru Vélmennaárásin og Þitt eigið ævintýri báðar tilnefndar til Íslensku bókmenntaverðlaunanna og Þitt eigið ævintýri einnig til Barnabókaverðlauna Reykjavíkurborgar.
Risaeðlur í Reykjavík komst á blað bandarísku verðlaunanna DeBary‘s Children‘s Science Book Award, sem sérhæfa sig í vísindabókum fyrir börn. Hann hlaut einnig hin virtu Margaret Wise Brown barnabókaverðlaunin fyrir bókina Strandaglópar! (Næstum því) alveg sönn saga. Ævar gaf út enn eina metsölubókina haustið 2024, Skólastjórann, og hlaut fyrir hana Barnabókaverðlaun Guðrúnar Helgadóttur.
Auk alls þessa hefur Ævar fengið fjögur Edduverðlaun fyrir Ævar vísindamann, verið valinn Framúrskarandi ungur Íslendingur og svo má lengi telja.
Leslyndi hverfist um yndislestur og uppáhaldsbækur. Þjóðþekktir bókaunnendur stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk, orðið er frjálst.
Viðburðaröðin hefur notið mikilla vinsælda og skapað sér fastan sess undanfarin misseri, þegar fólk flykkist að til að sjá hina ýmsu rithöfunda deila með okkur sínum uppáhaldsbókum.
Aðgangur er ókeypis og öll hjartanlega velkomin á meðan húsrúm leyfir.
Viðburðurinn er styrktur af menningar- og mannlífsnefnd Kópavogsbæjar.
