Glæpasagnadrottningin Yrsa Sigurðardóttir verður gestur í Leslyndi miðvikudaginn 8. apríl kl. 12:15.
Yrsa er einn vinsælasti og þekktasti rithöfundur landsins og hefur um árabil heillað lesendur með spennusögum sínum, sem margar hafa farið sigurför um heiminn og verið þýddar á fjölmörg tungumál. Hún hefur hlotið Blóðdropann þrívegis fyrir bækur sínar Ég man þig, DNA og Bráðina og verið tilnefnd til bæði Blóðdropans og Glerlykilsins, norrænu glæpasagnaverðlaunanna.
Ferill Yrsu hófst þó á barnabókum og fyrir verk sín á því sviði hlaut hún bæði viðurkenningu Barnabókaráðs Íslands og Íslensku barnabókaverðlaunin. Yrsa er byggingatæknifræðingur að mennt og starfar sem slíkur samhliða ritstörfum.
Í Leslyndi ræðir Yrsa um bækurnar sem hafa mótað hana sem lesanda og rithöfund og deilir sínum uppáhaldsbókum með gestum.
————-
Leslyndi hverfist um yndislestur og uppáhaldsbækur. Þjóðþekktir bókaunnendur stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk, orðið er frjálst.
Viðburðaröðin hefur notið mikilla vinsælda og skapað sér fastan sess undanfarin misseri, þegar fólk flykkist að til að sjá hina ýmsu rithöfunda deila með okkur sínum uppáhaldsbókum.
Aðgangur er ókeypis og öll eru hjartanlega velkomin á meðan húsrúm leyfir.
Viðburðurinn er styrktur af menningar- og mannlífsnefnd Kópavogsbæjar
