Andrés Ramón tónlistarmaður býður hlustendum í ferðalag um Suður-Ameríku þar sem hann flytur þjóðlög frá ýmsum löndum, spilar á mismunandi strengjahljóðfæri og syngur á spænsku og portúgölsku.
Ferðalagið hefst á Andesfjallasvæðinu með þjóðlögum frá Perú, Bólivíu og Kólumbíu. Lögin hljóma við undirleik á charango, 10-strengja hljóðfæri sem er einkennandi fyrir tónlistarstefnur frá Andesfjöllunum, þar sem tónarnir svífa yfir tindum þessa háfjallasvæðis.
Leiðin liggur svo norðaustur á sameiginlegt láglendasvæði Kólumbíu og Venezúela með afar ryþmískum lögum sem hljóma við kröftugan undirleik á cuatro, 4-strengja hljóðfæri, og endurspegla náttúruauðlindir og kúrekamenningu þessa svæðis.
Næst er farið suður til Brasilíu þegar lög úr samba og bossanova tónlistarhefðunum hljóma við dansandi gítarundirspil, og fegurð og kímni brasilísku tungunnar njóta sín á einstakan hátt. Ferðalaginu lýkur í Paraguay og Argentínu, með seiðandi ryþmum og tónum guaranía tónlistarstílsins, með lagi sem lýsir sambandi manna og náttúru þar sem ástúð, virðing og frelsi ríkir.
Lögin fjalla að mestu um nátturufegurð þessarar stórbrotnu heimsálfu, vísa til ýmissa staða, borga, mannfólks hennar og lífshátta, og eru þakklætisóður til þessa einstaka menningarheims.
Tónleikanir er hluti af verkefninu Bókasafnið í fjölmenningarlegu samfélagi en það er styrkt af Bókasafnasjóði og Nordplus.
https://www.instagram.com/hridanandaandresramon
