Sumarlestur 2025

Gaggalagó – Halló

Linda landnámshæna býður öllum börnum sem eru byrjuð að lesa í ævintýralegt ferðalag um landið sitt – Terra Gallina!

Þetta er engin venjuleg ferð – heldur sannkallað lestrarævintýri! Á leiðinni heimsækja börnin stórkostlega staði eins og borgina Santíeggó, sigla yfir Hænusund, kanna undur og ævintýri í Hanaoi og enda ferðina á sólríkri strönd í Hanama.

Hvað þarf að gera?

Það eina sem þarf að gera er að kíkja við á bókasafninu, fá þar vegabréf og byrja að lesa. 

Inni í vegabréfinu er landakort og svaðilförin hefst með Lindu landnámshænu efst í vinstra horni. 

Markmiðið er að lesa í 15 mínútur á dag og merkja þá við hvert barnið er komið á leið Lindu landnámshænu um Terra Gallina. Við fjórða hvern lestur hafa börnin lesið í klukkustund og lenda á stjörnu. Fyrir hverja stjörnu fá þau stimpil eða límmiða í vegabréfið á næsta bókasafni og jafnframt happamiða til að setja í lukkupott. 

Smám saman ná þau að heimsækja alla áhugaverðu staðina í Hænulandi (sem er einmitt það sem Terra Gallina þýðir!) og fá stimpil eða límmiða á allar stjörnurnar. Þá geta þau með stolti sagt: „Ég hef heimsótt Terra Gallina!“