Sumarlestur

MEEEIRA FJÖR! 🐐

Gúndi geithafur þarf hjálp!
Garnirnar gaula og nú hefst
🌿 grasleitin mikla 🌿

Gúndi geithafur hvetur öll 6–12 ára börn til að hjálpa honum að finna gras til að bíta. Með vegabréf í hönd safna þau stimplum eða límmiðum, happamiðum og fá skemmtileg þrautablöð – eftir því sem þau lesa meira.

Hvað þarf að gera?

Til að taka þátt þurfa börnin að:

• heimsækja almenningsbókasafn
• ná þar í vegabréfið
• og hefja lestur!

Inni í vegabréfinu er landakort og svaðilförin hefst með Gúnda geithafri efst í vinstra horni. 

Markmiðið er að lesa í 15 mínútur á dag og merkja þá við hvert barnið er komið á leið Gúnda í grasleitinni miklu. Við fjórða hvern lestur hafa börnin lesið í klukkustund og lenda á stjörnu. Fyrir hverja stjörnu fá þau stimpil eða límmiða í vegabréfið á næsta bókasafni og jafnframt happamiða til að setja í lukkupott. 

Smám saman ná þau að heimsækja alla áhugaverðu staðina sem Gúndi ferðast um og fá stimpil eða límmiða fyrir. Þá geta þau með stolti sagt: „Ég fann grasið í Grænuhlíð!“