Þann 12. febrúar á milli kl. 18 og 19 býður Bókasafn Kópavogs upp á viðburð til að heiðra minningu Kjartans Árnasonar sem hefði orðið sextugur þann dag.
Kjartan lést árið 2006 eftir að hafa glímt við taugasjúkdóminn MS um árabil en hann skilur eftir sig arfleifð af skáldverkum; smásögur, örleikrit og ljóð sem hann samdi og gaf út undir bókaforlaginu Örlagið sem hann stofnaði sjálfur árið 1986. Kjartan var fæddur og uppalinn í Kópavogi og stuðlaði að öflugu menningarlífi í bænum og var einn þeirra sem efndi til Daga ljóðsins í Kópavogi á sínum tíma en sú ljóðahátíð var haldin í 17. skiptið núna í ár og lauk 21. janúar s.l. með afhendingu Ljóðstafs Jóns úr Vör.
Boðið verður upp á notalegt síðdegi með léttum veitingum þar sem verk Kjartans verða höfð í hávegum með bæði upplestri og leik. Á meðal þeirra sem koma fram eru Anton Helgi Jónsson, Helga Jónsdóttir, Arnar Jónsson og Sigurður Skúlason.
Frítt inn og allir hjartanlega velkomnir.
15
okt
