Bókasafn Kópavogs í samstarfi við GETA – hjálparsamtök hlaut í síðustu viku 400.000 kr. styrk frá jafnréttis- og mannréttindaráði Kópavogsbæjar fyrir árið 2025. Styrkinn hlaut safnið fyrir verkefnið Get together, en verkefnið stuðlar að jafnrétti og mannréttindum með því að bjóða upp á opið hús á Bókasafni Kópavogs fyrir hælisleitendur, flóttafólk og innflytjendur.
GETA – hjálparsamtök halda utan um verkefnið og er opið hús alla föstudaga kl. 11:00-13:00. Mjög mikil ánægja hefur verið meðal þátttakanda með verkefnið. Mörg hafa mætt með börn sín á leikskólaaldri, sem ekki eru enn komin inn á leikskóla og hefur verið boðið upp á ýmis konar föndur, hannyrðir og fleira í hvert sinn, s.s. vatnslitamálun, perl, útsaum o.fl.
Lísa Z. Valdimarsdóttir forstöðumaður Bókasafns Kópavogs tók við styrknum og á opnu húsi á föstudaginn var færðu hún og Eyrún Ósk Jónsdóttir verkefnastjóri verkefnisins á Bókasafni Kópavogs þátttakendum verkefnisins fréttirnar við mikinn fögnuð.
Bókasafn Kópavogs og GETA – hjálparsamtök þakka jafnréttis- og mannréttindaráði Kópavogsbæjar kærlega fyrir rausnarlegan styrk og hlakka til áframhaldandi opinna húsa.
