Lánþegum á Bókasafni Kópavogs stendur nú til boða að nota stafræn bókasafnskort til þess að greiða sektir og ljúka þannig uppgjöri við safnið án þess að mæta á svæðið.
Bókasafnskort hefur verið til í stafrænni útgáfu um nokkurt skeið en bætt hefur verið við rafrænni greiðslugátt sem unnin var í samstarfi Kópavogsbæjar og Wise. Lausnin er sú fyrsta sinnar tegundar meðal bókasafna á Íslandi.
Með þessari nýjung geta íbúar og aðrir lánþegar sótt bókasafnskortin í símann og notað þau til að kaupa eða endurnýja kort rafrænt, endurstillt pin-númer tengt aðgangi og greitt sektir sem fyrr segir. Stafræna kortið virkar eins og plastkortið og er borið undir skynjarann í sjálfsafgreiðsluvélum eða notað í afgreiðslu þegar við á.
Lísa Zachrison Valdimarsdóttir, forstöðumaður bókasafnsins, segir nýjungina byltingu í þjónustu við lánþega á bókasöfnum landsins og vonast til að hún geti verið fordæmi fyrir önnur bókasöfn. „Mikil ánægja hefur verið með greiðslugáttina hjá gestum safnsins og notkun á henni eykst stöðugt,“ bætir hún við.
Markmiðið með innleiðingu á rafrænni greiðslugátt er að einfalda enn frekar daglegan rekstur bókasafnsins enda nýtist þá tími starfsfólks betur í þjónustu og ráðgjöf til lánþega. Nú hafa um 12% lánþega sótt sér stafrænt bókasafnskort og fjölgar þeim jafnt og þétt sem nýta sér þann kost.
Stafræn bókasafnskort og rafræn greiðslugátt eru liður í stefnu Kópavogsbæjar um að efla stafræna þjónustu og einfalda þannig samskipti við íbúa. Fleiri stofnanir bæjarins munu bætast við undir forystu stafræns þróunarteymis á Skrifstofu umbóta og þróunar.
„Næst á dagskrá eru stafræn sundlaugakort, sem margir íbúar hafa óskað eftir. Umbætur í þjónustu við íbúa eru okkur hjartans mál og við viljum einfalda lífið þar sem hægt er. Með tilkomu tækninnar hefur starfsfólk líka tíma til þess að gera betur við þá íbúa sem þurfa leiðsögn og þjónustu á vettvangi,“ segir Ásdís Kristjánsdóttir, bæjarstjóri Kópavogsbæjar.
