Hvernig og hvenær dreifðist mannkynið um heiminn? Hvar og hvernig urðu til meginleiðir milli þeirra á nýjan leik sem loks hafa leitt til alheimsvæðingarinnar?
Mannkynið varð til á einum stað – í Afríku. Þaðan dreifðist það til allra átta um gjörvallan heiminn og tók dreifing þessi tugþúsundir ára. Ísland var til að mynda eitt síðasta landið til að byggjast. Er dreifingunni lauk hafði fólk aðlagast hinum sundurleitustu aðstæðum. Löngu, löngu seinna – á síðustu árþúsundum – fór fólkið sem hafði dreifst um heiminn í stórum stíl að finnast og kynnast á ný. Það fór í ferðalög til að forvitnast, læra, stríða, versla. Ein birtingarmyndin er landkönnunin og landafundirnir svonefndu, önnur verslunarleiðir um lönd og höf, enn önnur alþjóðavæðing nútímans. Við vitum lítið um dreifinguna en meira um endurfundina. Meðal annars eigum við sögur af því þegar fólkið sem fór í vesturátt hitti fyrst fólkið sem fór í austur og fólk sem fór í fyrndinni norður hitti fólk sem fór suður.
Jón Benedikt Björnsson fjallar um dreifingu mannkyns um heiminn í erindi sínu á aðalsafni. Jón er sálfræðingur að mennt og var lengi félagsmálastjóri á Akureyri, þá sviðsstjóri hjá Reykjavíkurborg en eftir það starfaði hann sem ráðgjafi, rithöfundur, fyrirlesari og við kennslu.
Viðburðurinn er sá fyrsti í fyrirlestraröðinni Vegirnir um heiminn sem haldin er í fjölnotasalnum á 1. hæð. Öll velkomin á meðan húsrúm leyfir.
