Bókasafn Kópavogs í samstarfi við Fab Lab Reykjavík, býður til notalegrar jólapeysusmiðju. Komið með eigin flíkur og skreytið þær með ímyndunaraflið að vopni.
Skreytingaefni (textílvínyll) og verkfæri verða á staðnum en gestir eru beðnir um að koma með eigið efni, peysur eða boli. Börn koma í fylgd með fullorðnum og efnið sem á að hitapressa verður að þola hita.
Þátttaka er ókeypis og öll velkomin á meðan húsrúm leyfir.
Fjölskyldustundir á laugardögum eru styrktar af lista- og menningarráði Kópavogsbæjar.
Um Fab Lab
Fab Lab Reykjavík er hluti af Fab Lab Ísland og var opnað 24. janúar 2014. Fab Lab Reykjavík er samvinnuverkefni Reykjavíkurborgar, háskóla-, iðnaðar- og nýsköpunarráðuneytis og Fjölbrautaskólans í Breiðholti. Verkefnið felst í að reka stafræna smiðju sem styður við nýsköpunarhugmyndir meðal almennings, innan menntastofnana og í atvinnulífinu.
Markmið Fab Lab Reykjavík er að efla nýsköpun í samfélaginu. Áhersla er lögð á að efla nýsköpun í menntun, styðja við vöruþróun fyrirtækja og hlúa að nýjum hugmyndum hjá fólki á öllum stigum samfélagsins. Fab Lab myndar þannig skemmtilegt skapandi samfélag með fjölbreyttum hópi fólks sem á það sameiginlegt að vera forvitið, lausnamiðað og hefur þor til að prófa.
