Bókasafn Kópavogs og Soroptimistaklúbbur Kópavogs hafa gert með sér samkomulag um að klúbbfélagar sinni nú útkeyrslu bóka til þeirra lánþega sem nýta sér heimsendingarþjónustu safnsins.
„Við erum mjög glöð með að hafa eignast þessa traustu samstarfsfélaga,“ segir Lísa Z. Valdimarsdóttir, forstöðumaður Bókasafns Kópavogs. „Heimsendingarþjónustan er mikilvægur þáttur í starfinu hjá okkur, það skiptir okkur máli að sinna einnig þeim sem komast ekki á safnið. Útkeyrslan var hins vegar orðin ansi þungur baggi á daglegu starfi safnsins. Þess vegna er frábært að fá bandamenn eins og Soroptimista-klúbbinn, en margir félagsmanna þeirra eru einmitt fastagestir hérna á safninu.“
Glaðir og hressir Soroptimistar komu á safnið í síðustu viku til að fara fyrstu ferðina til lánþega. Allt gekk það ljómandi vel og var fyrirheit um gott samstarf í framtíðinni.
30
jún
