Listamaðurinn Guðbjörg Sigmundsdóttir, eða Gugga, opnaði einkasýningu á aðalsafni Bókasafns Kópavogs um miðjan janúar.
Sýningin ber yfirskriftina Moss en þar gefur Gugga gaum að fegurðinni í hinu smáa í náttúru landsins. „Þessi titill er margræður,“ segir Gugga, „því hann getur bæði vísað í mosann og einnig í tengsl og samskipti á milli fólks.“
Guðbjörg hefur sterkar rætur í Kópavogi. Foreldrar hennar voru frumbyggjar í bænum og Guðbjörg býr og starfar í Kópavogi, en vinnustofa hennar er í Auðbrekku. Hún hefur lært myndlist bæði á Íslandi og í Bretlandi og hefur nú myndlistina að aðalstarfi.
Myndirnar á sýningunni eru nær allar unnar í ár og í fyrra. Guðbjörg segir að þegar hún hafi byrjað vinnuna fyrir sýninguna hafi hún hugsað um „náttúruna, þann ytri veruleika sem augað greinir, hina eilífu hreyfingu og lífið sjálft sem í því speglast.“
Myndir Guðbjargar eru því með sterkri tilvísun í náttúruna, en hún vinnur úr formum hennar abstrakt form sem kallast á við fyrirmyndina, án þess að vera nákvæm eftirmynd þess. „Ef þú vilt fá eitthvað nákvæmt, þá tekur þú ljósmynd,“ segir Gugga og kímir. Hún segist sækja innblástur í náttúru nærumhverfisins – hraunið við jaðar byggðarinnar og kríurnar sem þjóta um himininn.
Guðbjörg segist vera af norræna skólanum í myndlistinni, á Norðurlöndum sé landslag tengt við tilbeiðslu og dulúð. Nú á dögum séu landið og náttúran álitin okkar dýrustu djásn og þess vegna freistar Guðbjörg þess að stilla saman formum þeirra og litum. „Þessar myndir eru um gleði, kærleik, vináttu og náin tengsl,“ segir Guðbjörg.
Sýning Guðbjargar er sölusýning og mun standa til 13. febrúar.
26
maí
30
maí
