Málverkasýning Steinars Ársælssonar, Fjallasýn opnaði á Bókasafni Kópavogs 15. júní og stendur til 13. júlí.
Á sýningu Steinars má sjá akrýlverk af íslensku landslagi og er áherslan sérstaklega á hálendi, jökla og sjávarlandslag. Verkin eru unnin abstrakt með sterkum litbrigðum til að knýja fram innri tilfinningar málarans. Steinar er sjálflærður málari og hefur verið að mála í nokkur ár.
Á síðustu árum hefur Steinar lagt æ meiri vinnu í málun. Myndefnið var til að byrja með fyrst og fremst litlar myndir af íslensku hálendi og hrauni. Það voru að mestu leyti impressionísk verk þar sem íslenskri náttúru er lýst með dökkum litum. Landslagið var þá oftar með rætur í raunverulegri sýn málarans á íslenskra náttúru. Undanfarið hefur Steinar verið að vinna í abstrakt landslagsverkum. Er hann heillaður af grófum stílbrotum og eru sterkir litir meira í forgrunni í verkum hans.
Fjallasýn er fyrsta einkasýning Steinars.
Fréttin birtist áður í Kópavogspóstinum.
18
jan
