Lestrarganga í Kópavogi hefur opnað og er hún samstarfsverkefni Bókasafns Kópavogs og Barnabókaseturs Íslands.
Gangan á sér hliðstæðu á Akureyri þaðan sem hugmyndin er komin og hafði Barnabókasetrið forgöngu um að varða 3 km gönguleið í Akureyrarbæ bókmenntatextum fyrir alla fjölskylduna.
Kópavogsútgáfan af lestrargöngunni markar leiðina frá Leikskólalundi við Digraneskirkju í gegnum Kópavogsdalinn að aðalsafni Bókasafns Kópavogs. Skemmtilegar járnbækur með textabrotum úr þeim íslensku barnabókum sem þjóðinni eru hvað kærastar hafa verið settar á ljósastaura í þægilegri lestrarhæð. Gangan fléttar því saman útivist, samverustundir fjölskyldunnar og lestrarhvatningu. Á Akureyri eru bækurnar 26 talsins en 6 titlar bætast í hópinn hér fyrir sunnan. Sumar bækurnar munu foreldrar kannast við frá því í bernsku, aðrar eru nýlegar og þekktar meðal barnanna.
Lista- og menningarráð Kópavogsbæjar styrkti verkefnið og öll vinnsla járnbókanna var í höndum prentsmiðju og stálsmiðs á Akureyri. Bækling um gönguna má nálgast á Bókasafni Kópavogs og nánari upplýsingar er einnig að finna á heimasíðu safnsins undir fræðsla.
Myndin sem fylgir er frá opnun göngunnar sem fór fram föstudaginn 18. ágúst. Góður hópur fólks þræddi Kópavogsdalinn í sólskininu, en hluti þeirra rithöfunda sem eiga bækur í göngunni var viðstaddur opnunina og nutu bæði menn og dýr veðurblíðunnar í dalnum.
11
maí
