Menningarhúsin í Kópavogi fagna löngum sólargangi með útijóga og jazztónleikum á sumarsólstöðuhátíð laugardaginn 23. júní.
Á útivistarsvæðinu við Menningarhúsin hefst opinn jógatími undir berum himni kl. 13 í umsjón Kristínar Harðardóttur jógakennara. „Gott er að mæta í þægilegum fötum og grípa með sér jógadýnu, teppi eða handklæði, en það er ekki nauðsynlegt þar sem við verðum á grasinu,“ segir Kristín. Að loknum jógatímanum hefjast útitónleikar á svölum aðalsafns Bókasafns Kópavogs kl. 14 en það er hinn góðkunni Kópavogsbúi og gítarleikari Björn Thoroddsen sem mun skemmta gestum. Léttar veitingar verða í boði á tónleikunum og er aðgangur ókeypis á báða viðburði.
Mynd: www.bjornthoroddsen.com
Áður birt í Kópavogspóstinum.
