Göngugarpar, lestrarhestar og fótboltaaðdáendur mættu á viðburði bókasafnsins á liðnum vikum þrátt fyrir mikla rigningartíð.
Stuðningsfólk íslenska karlalandsliðsins í fótbolta lét ekki veðrið stoppa sig og lagði leið sína á aðalsafn Bókasafns Kópavogs laugardaginn fyrir viku síðan. Þar var boðið upp á andlitsmálun fyrir fyrsta HM leik Íslands sem var gegn Argentínu og sýndur var á tjaldi á Rútstúni. Bókasafnið þakkar ungum sem öldnum fyrir komuna, áfram Ísland!
Thelma og Katla sáu um andlitsmálunina.
Það var heldur kuldalegt í lestrargöngunni sem farin var með Margréti Tryggvadóttur barnabókahöfundi laugardaginn 9. júní. Göngugarparnir létu það þó ekki á sig fá og voru hæstánægðir með útiveruna og fræðsluna. Bókasafn Kópavogs þakkar þeim sem tóku þátt kærlega fyrir komuna.
Áður birt í Kópavogspóstinum.
