Kópavogsbær tekur virkan þátt í hinsegin dögum og hefur dregið fána samtakanna að húni við stjórnsýslubyggingu og menningarhús bæjarins í tilefni af baráttu- og fræðsluhátíð hinsegin samfélagsins. Svæðið skartar einnig regnbogatröppum á milli Bókasafnsins og Salarins allan ársins hring.
Bókasafn Kópavogs hefur dregið fram og stillt upp bókum á öllum hæðum sem tengist hinsegin samfélaginu til að vekja athygli á brýnum málefnum þeirra. Þá verður hinn vinsæli Instagramreikningur safnsins helgaður málefnum hinsegin fólks allan mánuðinn sem og Tik Tok síða safnsins.
Kópavogsbær lætur sig málefni hinsegin samfélagsins varða með öflugu menningarstarfi á hausti komanda. Öllum nemendum í 10.bekk í grunnskólum Kópavogs verður boðið á rómaðan heimildasöngleik Bjarna Snæbjörnssonar og Grétu Kristínar Ómarsdóttur, Góðan daginn, faggi, í Salnum í Kópavogi. Hinir ástsælu Gunni og Felix munu einnig bjóða upp á sýningar í Salnum í Kópavogi þar sem fléttað er saman pælingum um alls konar fjölskyldumynstur, skapandi skrif, glens og gleði sem nemendum í 7.bekk í grunnskólum Kópavogs verður boðið á. Sýningarnar verða styrktar af Lista- og menningarráði Kópavogsbæjar.
