Bókasafn Kópavogs sló aðsóknarmet í október þegar samtals yfir 20.000 gestir komu í bæði útibú þess, aðalsafn og Lindasafn, þann mánuð. Aldrei hafa fleiri gestir sótt safnið í einum mánuði frá opnun árið 1953.
„Það er sérstaklega gaman að sjá svona tölur þar sem ráðist var í miklar breytingar á barnadeild aðalsafns í byrjun þessa árs og ný og endurbætt deild opnuð á jarðhæð ásamt Náttúrufræðistofu Kópavogs og alltaf óvissa með viðtökur á svona breytingum“ segir Lísa Z. Valdimarsdóttir forstöðumaður Bókasafns Kópavogs.
Viðburðahald í báðum útibúum hefur verið fjölbreytt og vel sótt undanfarið og margir vikulegir og mánaðarlegir viðburðir hafa skipað sér fastan sess hjá gestum. Á dögunum hlaut safnið Nordplus styrk fyrir verkefnum tengdum fjölmenningu og hefur áherslan í viðburðahaldi verið fjölbreyttari en áður og reynt hefur verið að koma til móts við þarfir allra.
„Það er líklegast og vonandi að skila sér í fleiri gestum á safnið og er það mjög ánægjulegt,“ bætir Lísa við og segir að lokum að mikilvægt sé að allir bæjarbúar upplifi sig velkomna á safnið burtséð frá kyni, þjóðerni, stétt eða stöðu. „Hér eru öll velkomin“.
