Nýtnivika verður á Bókasafni Kópavogs hefst í dag og stendur til 1. febrúar. Margt verður í boði sem snýr að endurnýtingu og sjálfbærni.
„Bókasafnið er hlutlaus staður og við höfum ávallt lagt upp með sjálfbærni og að vera vistvæn í okkar starfi. Það segir sig svolítið sjálft,“ segir Lísa Z. Valdimarsdóttir forstöðumaður Bókasafns Kópavogs. „Lánþegar okkar fá efni að láni og skila svo aftur inn í hringrásina.“
Á undanförnum árum hefur safnið haldið ýmsa nýtni viðburði, t.d. fataskiptimarkaði, leikfangaskiptimarkaði, búningaskiptimarkaði o.fl. og hafa allir þessari markaðir og viðburðir tekist mjög vel. Lísa segir ánægjulegt að sjá að fólk sé að verða meðvitaðra um umhverfið og sjálfbærni og vill í auknu mæli taka þátt í hringrásinni. „Við vorum einnig svo lánsöm að vera fyrsta bókasafnið sem opnaði sjálfsafgreiðsluskápa Hringrásarsafnsins fyrir nokkrum árum og hefur því verið vel tekið“ bætir Lísa við að lokum.
Við hvetjum öll til að skoða spennandi dagskrá safnsins þessa viku því margt er í boði og huga að umhverfinu í leiðinni.
Fataskiptimarkaður
25. janúar – 1. febrúar
Komdu með gömul föt sem þú notar ekki lengur en geta nýst öðrum og taktu þér eitthvað annað í staðinn. Það má bæði skilja eftir og taka föt, án allra kvaða.
Reddingakaffi
Laugardaginn 25. janúar kl. 13-16
Reddingakaffi eru ókeypis fundarstaðir sem snúast um að gera við hluti (saman). Á bókasafninu verða 10 sjálfboðaliðar frá Hringrásarsetri Íslands sem aðstoða við viðgerðir á reiðhjólum, rafmagnstækjum, textíl / fötum og tækjum. Gestir koma með brotna hluti að heiman. Ásamt sérfræðingum hefja þeir viðgerðir sínar í Reddingakaffi.
Fatanýting
Þriðjudaginn 28. janúar kl. 17-18
Hvernig getum við endurnýtt og breytt gömlum fötum? Sigríður Tryggvadóttir mun í þessum fyrirlestri fræða okkur um sjálfbærni, hægtísku og endurnýtingu á fatnaði.
Matarnýting
Fimmtudaginn 30. janúar kl. 17-18
Viltu læra að nýta afganga og mat betur? Guðrún Sigurgeirsdóttir ætlar að kenna okkur um nýtingu matvæla og gefa okkur hugmyndir að því hvað við getum eldað úr ísskápnum og þannig hjálpa okkur að minnka matarsóun.
Viltu einfalda lífið með KonMari aðferðinni?
Fimmtudaginn 30. janúar kl. 18-19
Viltu taka til og skipuleggja lífið með KonMari aðferðinni? Lísa Z. Valdimarsdóttir fer yfir grunnhugmyndina að baki aðferðinni, hvernig við getum nýtt hana á heimilinu og lífinu og sýnt hvernig föt eru brotin saman með aðferðinni.
