Lengi hefur tíðkast að leikskólar í Kópavogi komi með börn á sögustundir á Bókasafni Kópavogs, enda gott að byrja snemma að venja komur sínar á bókasafnið með börn.
Nú í vetur hafa Eyrún Ósk, verkefnastjóri fræðslu og miðlunar, og Gréta Björg, deildarstjóri barnastarfs, gert sögustundirnar ævintýralegri og meira spennandi en nokkru sinni fyrr. Þær hafa þróað svokallaðar skynjunarsögustundir, þar sem þær hafa bætt við hljóðum, leikmunum og sögupersónur gæddar lífi með leikrænum tilburðum, hljóðfærum og brúðum.
Sögustundirnar hafa slegið í gegn hjá börnunum, bæði hinum allra yngstu sem koma á foreldramorgna og einnig hjá leikskólabörnunum.
Í vor hafa þær einnig tekið upp á því að bjóða í álfasögustundir í holtinu við kirkjuna, en eins og öll vita búa álfarnir þar í steinum og klettum. Nándin við álfana veitir sögunum aukna dýpt og hlusta börnin sem bergnumin í öllum þessum frumlegu og skemmtilegu sögustundum.
