Sumarið í barnadeild er tileinkað lestrarhestum, bókasafnskisunni Gloríu og umhverfinu.
Sumarlesturinn
Í sumar býður Linda landnámshæna öllum börnum sem eru byrjuð að lesa í ævintýralega svaðilför um landið sitt – Terra Gallina. Á bókasafninu fá börn vegabréf og merkja við hvert skipti sem þau lesa í 15 mínútur eða meira. Fjórða hvert skipti lenda þau á stjörnu og geta þá fengið happamiða.
Við drögum út einu sinni í mánuði, í lok júní, júlí og ágúst. Nú þegar hafa 425 happamiðar skilað sér til okkar, sem þýðir að börnin hafa lesið í samtals 425 klukkustundir, og við erum í skýjunum að sjá hve dugleg börnin eru.
Þá er einnig sumarlestur unglinga í fullum gangi, en þau skila inn umsögnum og komast þannig í pott og eiga möguleika á að vinna 10.000 kr. gjafabréf í Nexus. Dregið er út mánaðarlega og hafa þau þegar lesið 58 bækur.
Umhverfisofurhetjan
Bókasafn Kópavogs og Náttúrufræðistofa hafa slegið höndum saman og efnt til stórskemmtilegs verkefnis fyrir börn sem stendur yfir í allt sumar. Umhverfisofurhetjan er vitundarvakningarverkefni þar sem börn geta leyst fimm umhverfistengd verkefni og fá þá titilinn umhverfisofurhetja og karsafræ í verðlaun. Hægt er að nálgast nánari leiðbeiningar í barnadeild.
Sumarsmiðjur alla miðvikudaga
Alla miðvikudaga í sumar verður boðið upp á föndursmiðjur á aðalsafni í Hamraborg 6a og Lindasafni í Núpalind 7. Smiðjurnar eru notalegar samverustundir fyrir börn og fullorðna þar sem þemað er Gloría bókasafnskisa, hvort sem verið er að föndra kort, bókamerki eða grímur.
