Bókasafn Kópavogs í samstarfi við GETU, félagasamtök er vinna að jákvæðu fjölmenningarlegu samfélagi, stóðu á dögunum fyrir austur-evrópskri matar- og menningarhátíð.
Mikil gleði og samstaða ríkti á viðburðinum og fólk á öllum aldri nutu hátíðarinnar.
Boðið var upp á ýmsar smiðjur, matar-smakk, tónlist og fleira. Pólsk prinsessa dansaði með krökkunum og bauð upp á prinsessu myndir til að lita. Tékkneskt brúðuleikhús mætti á svæðið. Úkraínska samfélagið á Íslandi eldaði hefðbundinn úkraínskan mat og bauð upp á matarsmakk. Haldin var fánasmiðja þar sem börn gátu komið og teiknað fána frá austur Evrópu og hengt upp á vegg til að skreyta safnið. Ungversk söngkona söng þjóðlög frá ungverjalandi í þjóðbúningi héraðsins sem hún er frá. Pólsku mælandi gestir fengu gefins barnabækur á Pólsku sem Bókasafn Hafnarfjarðar lagði til. Þá tóku Móðurmál – samtök um tvítyngi og Heimili og skóli, landsamtök foreldra þátt í viðburðinum með kynningu á starfsemi sinni fyrir gesti og voru þau einnig með bækur gefins á ýmsum tungumálum Austur Evrópu fyrir fjöltyngda gesti.
Það var mikið hlegið og nutu gestir samverunnar. Höfðu margir á orði hversu gott það var að fá tækifæri og rými til að hitta landa sína og nágranna.
Framundan í fjölmenningu
Bókasafnið leggur áfram áherslu á að bjóða upp á fjölmenningarlega viðurði. Á morgun (miðvikudaginn 18. mars) er vinnustofa á vegum W.O.M.E.N. félag kvenna af erlendum uppruna um réttindi á vinnumarkaði. Mánuði síðar, 18. apríl verður svo grísk matar- og menningarhátíð. Öll eru velkomin á báða þessa viðburði.
