Notalegir tónleikar með hinni frábæru söngkonu Margréti Eir. Ljúfar útsetningar á kunnum popplögum úr öllum áttum, nýjum og gömlum. Börkur Hrafn Birgisson kemur fram með Margréti á gítar. Tónleikarnir eru um það bil hálftíma langir og fara fram á annarri hæð safnsins. Ókeypis aðgangur og öll velkomin.
_____________________
Margrét hefur starfað sem tónlistarkona og leikkona í yfir þrjátíu ár. Hún sigraði í söngkeppni framhaldsskólanna árið 1991 og eftir það fór boltinn að rúlla.
Margrét Eir gaf út sína fyrstu sólóplötu árið 2000 sem fékk nafnið MEir en hún var gerð í samvinnu við Kristján Eldjárn gítarleikara. Tvær aðrar poppplötur komu beint á eftir; Andartak árið 2003 og Í næturhúmi árið 2004. Árið 2005 kom svo út MoR Duran – dúettaplata með Róberti Þórhallssyni. Árið 2002 varð Margrét ein af Frostrósum og kom fram á tónleikum Frostrósa næstu tólf árin.
2007 kynntist Margrét Eir manninum sínum Jökli og stofnuðu þau hljómsveitina Thin Jim and the Castaways. Þau hafa gefið út þrjár plötur: This is me árið 2012, If I needed you 2014 og sú nýjasta Days of Roses kom út árið 2022. Lagið Confession fékk tilnefningu til Íslensku tónlistarverðlaunanna 2022.
Tónlistarferill Margrétar inniheldur óteljandi framkomur á tónleikum, upptökur og sjónvarpsframkomu. Þá er helst að nefna War of the Worlds, afmælistónleikar Gunnars Þórðarsonar með Sinfóníuhljómsveit Íslands, Rigg tónleikar og leikhússýningar svo sem Vesalingana í Þjóðleikhúsinu, Mary Poppins í Borgarleikhúsinu og núna síðast Chicago hjá Leikfélagi Akureyrar.
