Gestur Leslyndis í nóvember er sjálf Kristín Helga Gunnarsdóttir.
Kristín Helga er fædd í Reykjavík þann 24. nóvember 1963. Hún er með BA-próf í spænsku og fjölmiðlafræði og hefur skrifað mikinn fjölda barna- og fjölskyldubóka, en hún er m.a. höfundur bókanna um Fíusól sem hefur einnig verið sett upp sem leiksýning, bókanna um Móa hrekkjusvín og Draugaslóðar.
Kristín Helga hefur hlotið Bókaverðlaun barnanna fjórum sinnum, Barnabókaverðlaun fræðsluráðs Reykjavíkur og Fjöruverðlaunin.
Leslyndi hverfist um yndislestur og uppáhaldsbækur. Þjóðþekktir bókaunnendur stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk, orðið er frjálst. Viðburðaröðin hefur notið mikilla vinsælda og skapað sér fastan sess undanfarin misseri, þegar fólk flykkist að til að sjá hina ýmsu rithöfunda deila með okkur sínum uppáhaldsbókum.
Aðgangur er ókeypis og öll hjartanlega velkomin á meðan húsrúm leyfir.
Viðburðurinn er styrktur af menningar- og mannlífsnefnd Kópavogsbæjar.
