Uppskeruhátíð sögustunda á Bókasafni Kópavogs
Miðvikudaginn 13. maí kl. 16.00 verður sannarlega veisla á aðalsafni Bókasafns Kópavogs, þegar haldin verður uppskeruhátíð sögustunda fyrir yngstu gestina. Tilefnið er eins árs afmæli verkefnisins Töfraheimur ævintýranna, þar sem skynjunarsögustundir fyrir börn á aldrinum 0–5 ára hafa verið þróaðar og haldnar með reglulegum hætti.
Verkefnið hlaut styrk frá Barnamenningarsjóði á síðasta ári og síðan þá hafa farið fram opnar skynjunarsögustundir fyrir fjölskyldur auk þess sem bókasafnið hefur tekið á móti leikskólahópum í hverri viku. „Við höfum séð hvað þessi aldurshópur tengist sögum og bókum vel í gegnum skynjun, leik og þátttöku, það hefur verið ótrúlega gefandi,“ segir Gréta Björg Ólafsdóttir. Eyrún Ósk Jónsdóttir tekur í sama streng og bætir við: „Þetta er leið til að byggja upp jákvætt samband barna við bækur strax frá upphafi.“
Á uppskeruhátíðinni tökum við á móti sérstökum gestum þegar rithöfundarnir Sigrún Eldjárn, Þorvaldur Davíð og Bergrún Íris lesa upp úr bókum sínum fyrir yngstu börnin. Þá verður boðið upp á fjölbreyttar smiðjur í tengslum við sögurnar: teiknismiðju með Sigrúnu Eldjárn þar sem börn geta teiknað og litað uppáhalds sögupersónurnar sínar, sokkabrúðsmiðju tengda Sokkalöbbunum og vináttusmiðju í tengslum við bækur Bergrúnar Íris. Í vináttusmiðjunni eru börn hvött til að velta fyrir sér spurningunni Hvað er vinátta? og svara henni með mynd eða orðum. „Við notum sögur sem inngang að samtali og sköpun, jafnvel með þeim, sem ekki eru komin með vald á tungumálinu enn þá, öll getum við skapað og tjáð okkur í gegnum töfraheim ævintýranna.“ segir Eyrún.
Að auki verður boðið upp á léttar veitingar fyrir gesti.
Viðburðurinn er öllum opinn.
