Í hádeginu þann 29. október munu söngnemendur úr Tónlistarskóla FÍH, þau Birgitta Sveinsdóttir og Guðmundur Daníel Erlendsson, flytja lög eftir Ellu Fitzgerald og Louis Armstrong.
Ella og Louis voru bandarískir tónlistarmenn sem höfðu mikil áhrif á sögu djassins. Ella var ein þekktasta djassöngkona allra tíma og Louis var þekktur trompetleikari og söngvari með sína einstöku, djúpu rödd. Þau unnu mikið saman og gáfu meðal annars út tvær plötur saman. Samstarf þeirra varð mjög vinsælt og lögin þeirra eru enn í miklu uppáhaldi hjá djassunnendum.
Um flytjendur:
Birgitta Sveinsdóttir er 23 ára gömul tónlistarkona úr Hafnarfirði. Tónlistin hefur fylgt henni frá ungum aldri og þegar hún var aðeins fjögurra ára gömul söng hún jólalög á geisladisk með foreldrum sínum. Hún stundaði bæði píanó- og söngnám sem barn, og er nú í námi í rytmískum söng á framhaldsstigi við Tónlistarskóla FÍH. Birgitta hefur einnig verið virk í kórstarfi og tekur þátt í ýmsum verkefnum í Kammerkórnum Huldur. Fyrir utan tónlistarferilinn er hún í kennaranámi í HÍ og starfar samhliða því bæði sem grunnskólakennari og söngkennari.
Guðmundur Daníel Erlendsson stundar nám í rytmískum söng við Tónlistarskóla FÍH og er nú kominn á sitt fjórða ár í skólanum. Ásamt því hefur hann einnig lært á píanó, klassískt og rytmískt, frá 5 ára aldri við hina ýmsu tónlistarskóla. Guðmundur er ekki einungis í námi heldur bregður hann oft á leik á tónleikum eða sýningum hér og þar, en síðastliðið sumar hélt hann fjáröflunartónleika með vinum sínum og vandamönnum og er búinn að halda ófáa tónleika með hljómsveitinni sinni Abbadís. Meðfram tónlistinni er hann útskrifaður af listabraut Verzlunarskóla Íslands og er nú í mastersnámi í Háskólanum í Reykjavík þar sem hann er að læra lögfræði.
Fjórða árið í röð bjóða framhaldsnemendur af söngdeild Tónlistarskóla FÍH til ljúfra hádegistónleika á Bókasafni Kópavogs.
Tónleikarnir fara fram síðasta fimmtudag hvers mánaðar en þar stíga tónlistarstjörnur framtíðarinnar á stokk með spennandi blöndu af gömlu og nýju, lög sem öll þekkja í bland við sjaldheyrðari smelli.
Tónleikarnir standa yfir í um hálfa klukkustund og eru öllum opnir á meðan húsrúm leyfir. Aðgangur ókeypis.
