Lesið á milli línanna – fellur niður

Því miður fellur lesklúbburinn niður í dag vegna veikinda. Sjáumst hress á nýja árinu.

Á fundinum 5. desember tökum við fyrir bókina Systraklukkurnar eftir Lars Mytting.

Í sjö hundruð ára gamalli stafkirkju í afskekktri sveit í Noregi hanga Systraklukkurnar og eru sagðar hringja þegar hætta steðjar að.

Árið 1879 kemur nýr prestur til þjónustu í sókninni og kveikir von í brjósti hinnar nítján ára gömlu Astridar sem dreymir um betra líf. Presturinn gerir Astrid að bandamanni sínum til að koma á nútímalegri siðum og losa sveitina við gömlu stafkirkjuna, klukkurnar og hjátrúna sem þeim fylgir. En þegar ungur arkitekt birtist alla leið frá Þýskalandi til að hrinda áformum prestsins í framkvæmd breytist allt. Astrid virðist hafa örlög sveitarinnar í höndum sér og þarf að velja á milli prestsins og heillandi framtíðar í öðru landi.
En þá hringja Systraklukkurnar.

Lars Mytting hefur hlotið fjölda viðurkenninga fyrir verk sín en Systraklukkurnar fengu meðal annars bóksalaverðlaunin í heimalandi hans Noregi og sátu í efsta sæti metsölulistans þar. Útgáfurétturinn hefur verið seldur til fjölmargra landa og hefur bókin alls staðar hrifið lesendur. Skáldsaga hans Synt með þeim sem drukkna kom út á íslensku og hlaut afar góðar viðtökur.

Bókaklúbburinn hentar öllum hressum konum sem vilja hittast, lesa á milli línanna og spjalla um yndislestur á léttu nótunum. Lesin er ein bók á mánuði sem er svo rædd fyrsta fimmtudag í mánuði á fundum klúbbsins.

Allar konur velkomnar á meðan húsrúm leyfir. Hlökkum til að hitta ykkur!

Fylgist með í Facebook-hópnum Lesið á milli línanna | Bókasafn Kópavogs.