Leslyndi hverfist um yndislestur og uppáhaldsbækur. Þjóðþekktir bókaunnendur stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk, orðið er frjálst.
Benný Sif Ísleifsdóttir, rithöfundur, mætir á Bókasafn Kópavogs í mars og fjallar um nokkrar uppáhaldsbækur.
Aðgangur er ókeypis og öll hjartanlega velkomin á meðan húsrúm leyfir.
Viðburðurinn er styrktur af menningar- og mannlífsnefnd Kópavogsbæjar.
Benný Sif Ísleifsdóttir er með bæði BA- og MA-próf í þjóðfræði og diplóma í hagnýtri íslensku frá Háskóla Íslands. Hún kom nokkuð geyst fram á íslenskt bókmenntasvið og hefur á örfáum árum markað sér spor þar. Benný hlaut nýræktarstyrk Miðstöðvar íslenskra bókmennta 2018 fyrir handritið að skáldsögunni Grímu sem kom út sama ár. Gríma vakti nokkra athygli, spurðist vel út meðal lesenda og hlaut Íslensku hljóðbókaverðlaunin, Storytel Awards.
Skáldsagan Hansdætur kom út árið 2020 og hlaut strax mikið lof gagnrýnenda og var tilnefnd til Evrópsku bókmenntaverðlaunanna. Framhald Hansdætra, Gratíana, kom út árið 2022 og hlaut fádæma góðar viðtökur lesenda.. Skáldsögur Bennýjar eru örlagasögur fólks úr íslenskum veruleika, höfundur tvinnar haganlega saman sorgir og sigra sögupersónanna og lesandinn getur vart annað en hrifist með. Nýjasta skáldsaga Bennýjar Sifjar er Speglahúsið sem kom út árið 2024.
