Bókasafn Kópavogs hefur frá stofnun þess verið í fararbroddi almenningsbókasafna á landinu hvað varðar framboð á safnkosti, þjónustu og fræðslu fyrir samfélagið í heild.
Í allri starfsemi safnsins hefur verið lögð áhersla á að hún sé í samræmi við nýjustu tækni, búnað og miðlun hverju sinni og nýsköpun höfð að leiðarljósi. „Nú er komið að því að taka skrefið lengra í afgreiðslu aðalsafns og gefa lánþegum tækifæri til að afgreiða sig sjálfir í gegnum sjálfsafgreiðsluvélar líkt og matvörubúðir og bankar bjóða,“ segir Lísa Z. Valdimarsdóttir, forstöðumaður Bókasafns Kópavogs. Lísa segir að sjálfsafgreiðsluvélar á bókasöfnum hafa verið til staðar í mörg ár en notkun þeirra á Bókasafni Kópavogs hefur ekki verið mikil frá því fyrsta vélin var sett upp árið 2007. Safnið keypti aðra vél í byrjun þessa árs og eru nú tvær vélar á safninu.
Frá og með 1. október mun starfsfólk í afgreiðslu leggja megináherslu á kennslu á sjálfsafgreiðsluvélar og hvetja alla sem hafa áhuga á að nýta sér þann möguleika að afgreiða sig sjálfir. Starfsfólk verður áfram til staðar í afgreiðslu en getur með þessari breytingu einbeitt sér að flóknari fyrirspurnum og veitt betri einstaklingsþjónustu en nú er gert. „Það er einlæg trú okkar að þessi viðbótarþjónusta geri lánþega ánægðari og öruggari með gögnin sín líkt og raunin er í bönkum og matvörubúðum. Hver vill ekki geta afgreitt sig sjálfur þegar honum hentar?“ segir Lísa að lokum.
Áður birt í Kópavogsblaðinu.
