Það ríkti mikil gleði á Bókasafni Kópavogs í gærkvöldi þegar tæplega hundrað börn og fullorðnir mættu á uppskeruhátíð sumarlestursins. Enda tilefnið mikið. Börnin í Kópavogi lásu í 1919 klukkustundir samtals, en það eru 80 sólahringar. Ef við gefum okkur að hver skóladagur sé 6 klukkustundir má segja að börn í Kópavogi hafi lesið í 320 skóladaga í sumar.
Gunnar Helgason kom og las upp úr væntanlegri bók sinni sem kemur út á haustdögum og síðan voru dregnir út nokkrir vinningar og allir sem tóku þátt í sumarlestrinum voru í pottinum. Að lokum fengu öll sem mættu á hátíðina stílabók með mynd af Gloríu bókasafnskisu Bókasafns Kópavogs með auðum síðum svo þau gætu sjálf skrifað eigin sögu, ljóð eða myndskreytt.
Þá var skálað í berjavatni og við gerðum okkur glaðan dag með poppi sem var í pokum skreyttum ævintýrasögupersónum.
