Hin vinsæla viðburðaröð Leslyndi hefur göngu sína á ný í Bókasafni Kópavogs eftir sumarfrí. Í Leslyndi mæta rithöfundar með bækur sem hafa mótað þá og skilið eftir spor í lífi þeirra og ritferli.
Fyrsta Leslyndi vetrarins fer fram 3. september en þá mun Sigríður Hagalín Björnsdóttir segja frá sínum uppáhaldsbókum. 1. október mætir Sjón með sinn bókastafla, 5. nóvember kynnumst við eftirlætis bókum Evu Bjargar Ægisdóttur og 3. desember fáum við að vita hverjar eru uppáhaldsbækur Kristínar Helgu Gunnarsdóttur.
Nálgun höfundanna er mismunandi, sumir fara aftur til bernsku og fjalla um áhrifamiklar barnabækur, meðan aðrir tala um bækur sem þeir lásu á fullorðinsárum, einhver hafa fókuserað á fáar bækur en flest velja sér vænan bunka, tíu til tuttugu bækur og segja frá þeim og hversvegna þau völdu þær.
Leslyndi hóf göngu sína í bókasafninu haustið 2023 og hefur notið mikilla vinsælda. Á meðal gesta hafa verið Pétur Gunnarsson, Auður Ava, Gerður Kristný, Þórarinn Eldjárn, Lilja Sigurðardóttir, Fríða Ísberg, Einar Kárason og fleiri.
Leslyndi fer fram í Bókasafni Kópavogs klukkan 12:15 fyrsta miðvikudag í hverjum mánuði og eru öll velkomin meðan húsrúm leyfir.
