Það var mikið um dýrðir Ásdís Kristjánsdóttir bæjarstjóri opnaði formlega nýja barnadeild Bókasafnsis og glænýtt rými Náttúrufræðistofu síðastliðinn laugardag. “Við gerum börnum hátt undir höfði í þessu glæsilega rými þar sem gefst tækifæri til sköpunar, leiks og næðis. Tengingin sem myndast á milli Náttúrufræðistofu og Bókasafnsins er öðruvísi, spennandi og áður óþekkt framsetning á Íslandi sem ég er fullviss um að Kópavogsbúar og aðrir gestir kunna vel að meta.” Segir Ásdís með stolti.
Hafist var handa við undirbúning breytinganna fyrir ári síðan og var meðal annars efnt til hugmyndasöfnunar meðal íbúa um nýtt sameinað rými Bókasafns og Náttúrufræðistofu. Theresa Himmer arkitekt hannaði breytingarnar á húsnæðinu og mikil ánægja er með hvernig til heppnaðist. Birtan flæðir um öll rými og tengir það svo fallega, það sést best á því hvernig gestir nýta rýmið, segir Soffía Karsldóttir, forstöðmaður menningarmála. Við eigum enn eftir að klára áfanga í verkinu því er næst óhætt að segja að það verði alltaf eitthvað nýtt að skoða fyrir gesti á næstunni.
Við erum í skýjunum með nýju rýmin á söfnunum okkar segja Lísa Z. Valdimarsdóttir forstöðumaður Bókasafnins og Brynja Sveinsdóttir forstöðumaður Náttúrufræðistofu. Fyrstu dagarnir eftir opnun hafa verið ævintýri líkastir vegna viðbragðanna sem við erum að fá frá gestunum okkar. Hér ræður forvitnin ríkjum, þau hlaupa á milli, skoða í skúffur og hillur, skríða inn í lestarhellana og njóta.
Brot úr ævi jarðar er ný sýning í Náttúrufræðistofu en frábært teymi kom að því að skapa sýninguna, en sýningarstjóri er Brynhildur Pálsdóttir. Brynja Sveinsdóttir starfaði náðið með einvala lið hönnuða og sérfræðinga til þess að skila þessari glæsilegu útkomu en það eru auk Teressu og Brynhildar; Studio Studio (Arnar Freyr Guðmundsson og Birna Geirfinnsdóttir), Hulda Margrét Birkisdóttir, Sævar Helgi Bragason, Júlía Kristín Kristinsdóttir, Elín Edda Þorsteinsdóttir og Cecilie Gaihede.
Við þökkum öllum sem komu og nutu með okkur á laugardaginn og hlökkum til þess að taka á móti ykkur áfram í þessu glæsilega rými.
Hér má sjá myndir sem Sigríður Marrow ljósmyndari tók á laugardaginn.
