Bókasafn Kópavogs mun loksins opna aftur gestum og gangandi þann 4. maí en það hefur verið lokað frá því 11. mars vegna verkfalls Eflingar í Kópavogsbæ og síðan fylgdi í kjölfarið áframhaldandi lokun vegna COVID-19 faraldursins.
Þrátt fyrir að bókasafnið hafi verið lokað hafa starfsmenn verið að störfum á bak við luktar dyr safnsins. Einnig hafa sumir starfsmenn unnið að ýmsum verkefnum að heiman til þess að auðvelda framkvæmd tveggja metra reglunnar á vinnusvæðinu. Verkefnin hafa verið fjölmörg og fjölbreytt sem unnin hafa verið á meðan lokun stóð. Þar mætti sem dæmi nefna plöstun og frágang bóka, endurröðun í hillum, grisjun og tiltekt, skipulagningu viðburða og dagskrár næstu mánaða svo og gerð fræðsluefnis fyrir skólahópa. Starfsfólk hefur einnig verið duglegt að lesa á milli anna til þess að geta leiðbeint lánþegum enn betur um lesefni þegar bókasafnið opnar á ný. Nánari upplýsingar varðandi þjónustu við opnun verða kynntar þegar nær dregur og verða reglur í samræmi við leiðbeiningar frá yfirvöldum. Við hlökkum til að taka á ný á móti lánþegum okkar og gestum á fyrstu sumardögum þessa árs. Gleðilegt sumar!
Frétt birtist áður í Kópavogspóstinum.
