Ljóðstafur Jóns úr Vör 2006

Á kvöldin sópa ég sólskininu af þökum húsanna

kveiki rauðan glampa í rúðum

fylli höfnina af logandi skuggum

og breiði stjörnuskikkjuna yfir himininn

ég er nafnlaus eins og andvarinn

sem bærir gluggatjaldið

ljósið sem kviknar um leið og það deyr

blossinn í fingrum myrkursins

ég færi ykkur nótt flugmannsins

rifin segl draumanna

inn í svefninn ferðast bifreið

sendibréf í hanskahólfi

ljósmynd af bláu myrkri

ég breyti syrgjendum í blóm

hengi gifshendur í trén

trekki upp spiladósir bernskunnar

horfi á þung augnhár þín síga

vegvísar þjóta gegnum ljósaskiptin

þar sem fjallsbrúnirnar loga

og stúlkan við bensíndæluna snýr vinstri vanga að tungli

sem glottir milli tinda