Mörg okkar upplifa ofhlaðna daga árum saman og eigum erfitt með að sjá fyrir okkur hvernig við getum snúið dæminu við.
Við viljum vera drífandi og dugleg og sjálfsvirði okkar tengist gjarnan þeim eiginleikum.
Oft er drifkerfið vel virkt en við eigum það til að gleyma því að slaka vel á inn á milli.
Hvað gerist þegar við byrjum að sinna sefkerfinu reglulega? Hvaða áhrif hefur það á svefninn, næringuna og andlegt heilbrigði okkar?
Eva María Jónsdóttir, jógakennari og fjölmiðlamaður, kynnir aðferðir til að ná tökum á jafnvæginu á milli þess að kreppa og slaka, starfa og hvíla, hugsa og vera.
Aðgangur er ókeypis og öll hjartanlega velkomin á meðan húsrúm leyfir. Þau sem hafa tök á að taka með sér jógadýnu eru hvött til að taka hana með sér.
Menning á miðvikudögum er styrkt af lista- og menningarráði Kópavogsbæjar.
Viðburðurinn er liður í afmælisdagskrá Bókasafns Kópavogs en safnið verður 70 ára þann 15. mars. Hlökkum til að sjá ykkur!
